الفراخ المشوية مع الارز البخاري مقدمه من شيف مروة الجزار
الفراخ المشوية مع الارز البخاري
الفراخ المشوية مع الارز البخاري
مقدمه من شيف مروة الجزار
طبقنا انهاردة مشهي جدااااا ولذيذ هنعمل مع بعض الرز البخاري وازاي يطلع الرز مستوي كويس ومفلفل وفراخ مشوية بريحة الفحم ولا الذ من كده
واحنا ليه نشتري فراخ مشويه من بره لما ممكن نعملها في البيت بكل سهوله والطعم ولا اروووووع بجد رائعة وبنفس طعم بره ويمكن احلي كمان
يلا بينا علي الطريقة
في البداية هنجيب فرخة وزن من ١٢٠٠ الي ١٥٠٠ جرام ويفضل متزدش عن كده ونفتحها من الضهر بالسكينة وندقها عشان العضم البارز يتساوي او ممكن تخلي الفرارجي يفتحهالك زي مانتي عاوزة او ممكن تتقطع صدرين ووركين حسب مانتي تحبي تمام كده .
هنحط في الكبة او الخلاط طماطميتين وبصلتين كبار وليمونه حلوة كده نقطعها ونحطهم لفتين في الكبة ونطلعهم نصفيهم تماما عاوزة بس الميه الي نزلت منهم ونشطف الكبة ونحط مايه البصل والطماطم تاني ونضيف ليهم معلقتين تلاتة خل ومعلقتين كبار زيت زيتون او زيت عادي بيدي لون شوي حلو اوي ومعلقة كبيرة صلصة ولو عندك اي صوصات زي الصويا صوص او دبس الرمان وحطيت معلقتين صوص الباربكيو عشان يديها الطعم المدخن الحاجات دي بتديها مزازة لو معندكيش مش مشكلة وتحطي توابلك الحلوة في الكبة برده ملح وفلفل وكمون وبهارات فراخ ورشه سماق متكتريش وروز ماري او زعتر التوابل الي بتحبي طعمها في الفراخ وتضربي الكلام ده كله في الكبة كويس وتجيبي الفرخة بعد ما نشفتيها وتنقعيها في التتبيلة دي مش اقل من ساعتين وكل ما تزيد تاخد من الطعم وتتبل كويس .
هنحضر شبكة الشوي ونرص الفراخ عليها وباقي التتبيلة هنحطها في صينية كبيرة متغلفة بورق فويل ومعاها كوباية ماية وتحطي الشبكة علي الصينية وعلي الفرن سخن جدا وكل شوية اخد من السائل الي بينزل من الفراخ مع بقية التتبيلة وبمعلقة وارش علي الفراخ وكل شوية الف الشبكة عشان الفراخ تتحمر من الناحيتين كويس مع فتح الشواية لحد ما تتأكدي انها استوت هتحطي سكينة وتختبريها تطلعيها تكوني مولعه فحمة وتحطيها في نص الفراخ وتطفي الفحمة بمعلقة سمنة بلدي وتغلفيها بالفويل وتكتمي الريحة لمدة ١٠ دقايق وشوفي النتيجة بجد طعم وريحة رهيييييبة وبالف هنا وشفااا
الرز البخاري
في حلة علي النار هننزل ببصلة صغيرة مبشورة وزيت ومعلقة سمن وننزل عليها بملح وفلفل وبهارات كبسة وكاري وكركم وعودين قرنفل وورق لوري وفصين حبهان وعودقرفة خشب ولومي وتقلبي الكلام ده كله مع البصلة وتنزلي بجزرة صغيورة مبشورة وتقلبي لحد ما تشمي ريحة البهارات دي ظهرت تنزلي بالشوربة او ماية وتكوني ناقعة الرز البسمتي في ماية سخنة ورشة ملح الشوربة تغلي غلوتين تصفي الرز وتقلبي وتسيبيه يغلي وتنقليه علي نار هادية يكمل سواه ولكل كوباية رز بسمتي منقوعة قصادها كوبايه وربع شوربة وممكن يتعمل بالرز المصري عادي جدا
اتمني اكون افدتكم ويطلع احلي من ايديكم
مروة الجزار.
والف هنا
رئيس قسم المطبخ أ سمسمه سعد
تابع ايضاطريقه عمل مينى كرواسون اقتصادى جدا مقدمه من شيف فاطمه عطيه