ما تريد معرفته عن الثانوية العامة .. وزير التعليم يتحدث

تظل الثانوية العامة مرحلة فاصلة وخطيرة، والشغل الشاغل لمعظم البيوت المصرية، حيث تنشغل هذه الأيام بامتحانات الثانوية العامة والتي لم يتبق عليها سوى أيام قليلة، وهناك أسئلة كثيرة تدور في أذهان الطلبة وأولياء الأمور، حول هذا الموضوع، وفي هذا الصدد قام وزير التربية والتعليم والتعليم الفني، بحسم كل ما يخص امتحانات الثانوية العامة، بعدد الأسئلة والدرجات لكل مادة، والكثير من الأمور، التي جاءت كالتالي:

كتبت- دعاء علي

ورقة الإجابة ولجان الامتحان
= عايز تاخد ورقة الإجابة بدري قبل الساعة ٩ وتكتب بياناتك وتسجل رقم الجلوس وتراجع بياناتك قبل الامتحان.. يبقى تروح اللجنة بدري وتتفتش بدري وتدخل لجنتك بدري.

= جميع لجان الثانوية العامة مزودة بكاميرات مراقبة. والكاميرات متصلة بغرفة عمليات.. ونقدر نشوف أي حركة داخل اللجنة.. هنجيبك يعني هنجيبك لو عملت حاجة غلط.

التفتيش بالعصا الالكترونية
= الطالب وهو داخل من باب المدرسة هيتفتش حتى لو وصل متأخر ومش هيدخل غير لما يتفتش.. لكن بعد بدء الامتحان هندخل اللجنة ونمرر العصا الإلكترونية على الطلبة وهم بيمتحنوا بشكل هادئ.. لو الجهاز عمل صوت يبقى معاك أداة غش وستتمسك ويتعمل لك محضر وهتسقط.. ده مش تفتيش.. ده مرور عادي وانت بتحل الامتحان وطالما مش معاك حاجة يبقى تخاف ليه؟

= تسريب امتحانات الثانوية العامة مستحيل قبل الساعة ٩ الصبح وأي ورقة تظهر قبل الساعة ٩ تجاهلها واتعامل إنها مزيفة ١٠٠٪؜.. لكن اللي هيصوّر وينشر أسئلة هنجيبه بعد خمس دقايق وهنعرف مكانه فين بالظبط. وهيسقط سنتين و

= ٧٠٪؜ من الأسئلة بدون صعوبة لكن ٣٠٪؜ هتيجي لأصحاب مستويات التفكير العليا (صعبة شوية).

أوراق بنصححها بطريقة مختلفة
= أي إجابة في ورقة الأسئلة مش هنصححها ولا الطالب هياخد عليها درجة واحدة.. بيني وبين الطالب ورقة الامتحان

= أي ورقة فيها علامة (إكس) على إجابة سؤال معين بنصححها بطريقة مختلفة.. وكل اللي بيتقال إن علامة الإكس بتلغي الدرجة غير صحيح تماما. لأ.

= من حق طالب اللغات في الثانوية العامة، يجاوب على الأسئلة المقالية باللغة العربية أو الإنجليزية، اللي يريحه.

الفرق بين المدارس العربي واللغات
= الفرق الوحيد بين بابل شيت طالب المدرسة العربي وبابل شيت طالب المدرسة اللغات، إن ترتيب الإجابة لطالب المدرسة العربي (أ- ب- ج-د) وطالب المدرسة اللغات هيلاقيها a-b-c-d.

= قللنا عدد أسئلة مادة الإحصاء إلى ١٧ سؤال فقط عليهم ٢٥ درجة.. لكن جميع أسئلة المواد غير المضافة للمجموع اختيار من متعدد وكل سؤال درجة واحدة فقط.

حركات الطالب مرصودة
= تصحيح الأسئلة المقالية هيكون من خلال اتنين مصححين لكل سؤال.. لو الاتنين قالوا الطالب يستحق على السؤال الدرجة كذا يبقى دي درجة الطالب في السؤال.. لكن لو اختلفوا في تقدير إجابة الطالب بما يزيد على نص درجة (يعني واحد قال درجة وواحد قال نص درجة).. هنستعين بمصحح تالت يصحح لنفس السؤال علشان الطالب ياخد حقه، وهياخد الدرجة الأعلى.

= أي بيانات الطالب بيكتبها بنراجعها مرة واتنين وتلاتة قبل وبعد التصحيح.

= متحاولش تغش من اللي قدامك أو اللي وراك علشان ترتيب الأسئلة مختلف. وخذ بالك انت كل حركة بتعملها في اللجنة متشافة بالكاميرات.. ركز في ورقتك وبس.