ماما حبيبة القلب
ماما حبيبة القلب
بقلم/د.بوسي الصعيدى
اللي العين ماتشبعش الا لما تشوفها بخير وتطمن عليها
عمود الخيمة واساس البيت
تبان سهلة وهينة وطيبة
لكن قوية وشايلة شيلة تهد الجبال
وفي عز تعبها كلنا ساندين عليها
هى اللمة الحلوة والدفا في عز برد الشتا
وأجمل أيام رمضان
هي العيد بأفراحه
هى مفتاح سعادة في وسطنا ومش حاسين وحتي هى مش حاسة
حياتنا من غيرك بلا أعياد ياست الكل وشمس الصباح
ربنا يديمك نعمة في حياتنا ويعينك علي همومنا وشيلتنا التقيلة
ويجازيكي بفضله لاننا مهما عملنا مش هنقدر نوفيكي حقك يا أغلي الحبايب وأكتر قلب عرف الحب والرحمة علي وجه الأرض واتعذب بسببهم
كل حاجة عندك بزيادة
الحب زيادة ورحمة زيادة وخوف علينا بزيادة واهتمام بزيادة وعطاء بلا حدود ربنا يزيدك من فضله ويعيننا نقدر كل ده ونشوفه بقلوبنا ياست الحبايب
بحبك وهفضل أحبك لحد أخر نفس في عمرى وممتنة بجد لكل حاجة عملتيها
وممتنة لوجودك معايا وبشكر ربنا كل يوم علي وجودك في حياتي
وعمرى ما أنسي فضل أبويا وحبيبي بس ماينعفش نكتب عنه جزء صغير في عيد الأم
دا ينكتب فيه كتب ومقالات ويتعمل بدل العيد أعياد ربنا يحفظ كل ماما وبابا لأولادهم وينعم عليهم بالرحمة والمودة والسكينة اللي تشبع ولادهم حب
وينعم علي أولادهم بالبر والحب اللي يطمن قلوب بابا وماما بوجودهم
كل سنة وأنتى طيبة ياست الكل وحبيبة القلب