” ليس كل ما يلمع ذهباً”
كتبتها / دعاء خطاب
أوقات كتير بنقابل ناس مظهرها لامع
وكلامهم يشدك وتصرفاتهم جديده عليك
يمكن تتاخد بتصرفاتهم الملفته القويه
وتتشد لألوانهم الفاقعه وحضورهم
الطاغي.. ثقتهم في نفسهم.. و حديثهم
الجذاب بشكل غير مألوف..
وجايز بريقهم يبهرك ويجذب عينيك
لفتره ولما تقرب منهم وتعاملهم
وتروح الزهوه وينطفى البريق ..
ماتلاقيش جواهم غير فراغ كبير
مافيش شئ أصيل فيهم.. مجرد وهج
قوي عمي عينيك لفتره اخد وقته وراح!!
فرق كبير بينهم وبين الناس الحقيقيين
الناس اللى بجد…المليانين معانى جميله
وشخصياتهم ثريه بالفعل ورغم كده
بيتعاملوا بمنتهى التواضع والبساطه
هاديين في روحهم وحضورهم
ألوانهم رايقه وخطوطهم واضحه
وبيستقبلوا الثناء والمديح فى
شخصهم بخجل وابتسامه رقيقه
وبيرجعوا دائما الفضل لله
فى كل شئ قيم هما بيتمتعوا بيه
انت اصلا عارف قيمتهم ولمستها
فى حاجات كتير مرت بينكم..
بس حلوه بردو المواقف دى اللى بتركز
دائره الضوء على الأهم في حياتك
وبتفكرك بقيمه الأشياء الحقيقيه
اللى لما يمر عليها الوقت بتتركز أكثر
وتصبح زى العطر الأصلى الثمين
اللى زاد جماله وفاح عبيره بمرور الزمن.
شكراً من القلب لكل شخص..
يجعل الحياة ألطف بكلماته الرقيقه
أيسر على النفس بأفعاله البسيطه
بمبادراته اللا متوقعة و وجوده الحقيقي
أجمل بصدق إحساسه ودوام مودته
وأرقى بأصاله طبائعه وطيب منبته
شكراً لمن جعلوا عالمنا مكان أفضل
شكراااا لصانعي أيامنا بلطفهم.
” ليس كل من قال احبك صار حبيباً ”
