لسه متفرجتش على مسلسل «بيت بابا»؟يبقى فاتك كتير قوي
كتب / بسمة عطية منصور
لو لسه متفرجتش على مسلسل «بيت بابا»، فأنت فعليًا فايتك تجربة مختلفة من الكوميديا الراقية، كوميديا بسيطة وصادقة، قادرة توصل للقلب بسرعة ومن غير أي افتعال أو مبالغة.
المسلسل بطولة محمد أنور، والفنان القدير محمد محمود، والفنانة الرائعة انتصار، وتوليفة بالشكل ده كان طبيعي تنتج عمل قريب من البيوت المصرية، وشبه تفاصيلها اليومية. توليفة نجحت في تقديم مسلسل عائلي دافي، يعتمد على كوميديا الموقف والعلاقات الإنسانية أكتر من الاعتماد على الإفيه.
تدور أحداث «بيت بابا» في إطار اجتماعي خفيف حول الحياة اليومية داخل أسرة مصرية، ويجسد الفنان المبدع محمد محمود شخصية رب الأسرة، وهو الدور اللي يقدمه بإحساس عالي وبساطة محسوبة، خلت الشخصية تبدو حقيقية وقريبة من المشاهد.
والحقيقة إن محمد محمود بيأكد في كل عمل جديد إنه فنان من العيار الثقيل، عنده قدرة كبيرة على الإمساك بتفاصيل الشخصية من غير استعراض أو استسهال. ومن وجهة نظري، هو واحد من الفنانين اللي لسه ما أخدوش حقهم كامل رغم موهبته الواضحة وحضوره المختلف.
أداء محمد محمود في «بيت بابا» جاي هادي، ذكي، ومعتمد على الإحساس ورد الفعل الطبيعي، وده اللي خلّى الشخصية توصل بسهولة وتسيب أثر من أول ظهور.
النجاح اللي حققه المسلسل ما كانش جماهيري بس، لكن كمان لاقى إشادات صحفية، ركزت على إن «بيت بابا» قدم نموذج للكوميديا العائلية النظيفة، ورجع صورة البيت المصري للشاشة بشكل بسيط وقريب من الواقع. كما أشادت آراء نقدية بالأداء المتزن لأبطاله
في النهاية، «بيت بابا» مش مجرد مسلسل كوميدي، لكنه تجربة إنسانية دافئة، بتثبت إن الضحك الحقيقي بيطلع من الصدق، وإن الأداء البسيط لما يكون نابع من موهبة حقيقية، يقدر يوصل أسرع وأقوى