عود نفسك تشوف كل حاجه صح على حقيقتها

عود نفسك تشوف كل حاجه صح على حقيقتها

 

بقلم: الإعلامية ماريان ألفى

 

هتعدي عليك مرحله فـ حياتك هتبدأ تشوف كل حاجه ع حقيقتها ..

هتكتشف حاجات مكنتش تتخيلها,كل الأشخاص  إللي أنت كنت فاكر إنهم بيحبوك وبيشجعوك وبيهتموا بيك هتتخدع فيهم مع أول موقف يحصل بينكم وتكتشف أن مش هو ده الشخص إللي انت تعرفه وتتفاجئ بتفكير وكلام بيتقال يخليك تقول انت إزاي شفت الشخص ده إنه كويس وجدع

كل إللي أنت كنت شايفهم طيبين هتلاقيهم اكتر ناس اذوك بكلام يخلوك تستغرب ومش فاهم هما دول بجد طلعوا كده وانت مخدتش بالك

هتلاقي ناس عملت معاهم كل خير وهتلاقي المقابل بتاعك أنهم عملولك بلوك بدون سبب لمجرد ان المصلحه خلصت او إنك اعترضت علي حاجه وملبتش رغبتهم

كل إللي كنت فاكرهم سند ليك وقت لما تلجألهم هيخذلوك وهيصدموك

 بس أشكر ربنا علي كل ظرف ومحنه وموقف عدي عليك وكشفلك حقيقتهم علشان لولا المواقف دي كنت هتفضل مخدوع فيهم طول عمرك وهتفضل تتعامل معاهم بنيتك الصافية وهما للاسف مايستاهلوش

اه هتزعل وهيصعب عليك نفسك وتستغرب وتقول ليه عملوا كده  وانا مأذيتهمش ولا قصرت معاهم في حاجه 

 في الحاله دي هما إللي هيكونوا  خسروك مش أنت

أنت هتكسب نفسك  وهتتعلم بعد كده إنك تحكم علي الشخص بالمواقف والأفعال مش بالكلام  ولا بالعشره والسنين

هتتعلم كتييير آوي وأولهم إنك متكونش مفرط في محبتك وثقتك لأي حد

حبّ وصاحب و اعرف ناس جديدة واعمل علاقات كتير،بس أوعى تقول في يوم من الأيام  جُملة “كل إلا ده”،علشان فعلياً هو اكتر حد هتشوف منه حاجات متتوقعهاش

إلي كانوا أقرب الناس ليك هما أكتر ناس سبب فأذيتك وتعبك،الحياه بتمُر و فعلا مفيش حاجه بتفضل علي حالها كل حاجه بتتغير حتي المشاعر,وكله بيرجع غريب زي ما كان

خد حذرك وسيب مسافة أمان لنفسك

 وهي إنك متتعلقش، ومتثقش فى بقاء حد العمر كله

محدش بيتضمن لآخر العمُر ومافيش حاجه بتتضمن أصلا

عود نفسك علي خسارة الناس واتمرن علي الوحدة

حكمه إنك تيجي للحياة وحيد وإنك تسيبها بنفس الطريقة مجتش من فراغ.