أنتشر على صفحات السوشيال ميديا في السنوات الأخيره كلام كتير وكأنه إتجاه والناس ماشيه وراه ..بيشجعوا بعض على عدم التسامح والتمسك بالغضب تجاه أي شخص اذاهم
والدعاء عليه طول الوقت وحسبي الله ونعم الوكيل لا تفارق صفحاتهم وكلامهم واكتر من كده كمان.. بدون مراجعه للنفس والعقل في الكلام اللي بيرددوه.. رغم ان المفروض إن البلاء والوباء اللي اجتاح العالم واخد كتير مننا يكون خلانا نعمل وقفه مع الذات ونراجع كتير من أفكارنا ومفاهمنا عن الحياه والعلاقات والمعاملات والدين!!
* ليه دايما بنفكر إن تمسكنا بغضبنا
وحقدنا وزعلنا ونعيش سنين وسنين
شايلين حمل بيتقل على الظهر ويقطمه
والعمر يروح وإحنا مستنين نشوف إنتقام
ربنا وذله للي ظلمنا.. أسهل اوووي من
إننا نعمل بنصيحه ربنا لينا.. في السماح
والعفو عن اللي ظلمنا؟!
* العفو والتسامح ده لينا إحنا على فكره مش علشانهم.. الظلم ظلمين.. ظلم بين عبد وعبد وظلم بين عبد ورب.. الجزء اللي يخصني حسامح فيه علشان اتحرر من الشيله التقيله دي نفسيًا واللي معظمنا عاش بيها سنين طويله.. سنين قهر ومرض نفسي وجسدي.
* طيب سامحت وعفيت..
هل اللي ظلمني رجع حقي؟
هل جالي حق نفسه واعتذر؟
هل اعترف ليا بإني صاحبه حق؟
– لو الإجابه “لأ” … يبقى لسه عداله السماء واخده مجراها لأن الظلم اللي بين عبد ورب لم يُرفع.
* طيب جرب كده..
1- تسامح وتعفو
2- تدعي بالهدايه وصلاح الحال للي ظلمك وإن ربنا يرده إليه ردًا جميلا ويلهمه الصواب..وتواصل الدعاء له بشكل يومي.. حول طاقه الغضب والدعاء عليه.. لطاقه تسامح وتدعي له.
3- ربنا إذا هداه.. يكف اذاه عنك وعن غيرك.
4- حقك حيرجع لك أسرع بس في الصوره اللي ربنا يشوفها أنسب متتشرطش على الله.
يعني مش بالضروره اللي راح فلوس يرجع فلوس.. ممكن يرجع فلوس.. وممكن بركه.. ستر صحه.. تدبير أمرك.. رفع مرض عنك.. يرد عنك وعن أولادك.. وبيتك إبتلاء.. يطهر شويه من ذنوبك محدش فينا مابيغلطش!!
” أنت سلمت ملف القضيه
كلها ورفعته لقاضي السماء”
5- “حسبي الله ونعم الوكيل”
مش للدعاء على الغير..هو دعاء يعني الله كافيني هذا الشئ او هذا الشخص.
6- جايز في البدايه حتبقى صعبه اوي على نفسك تطلع منك دعوه له وتقيل على لسانك.. معلش اعملها من غير نفس.. اعملها وانت مش مقتنع
مافيش مشكله.. لكن داوم.. متقطعش مهما استجد منه.. الشيطان حيحاول يكعبلك.. يمنعك انت مكمل مع الله.. تلاقي سبحان الله الدعاء يوم عن يوم يبقى أسهل وايسر على نفسك ولسانك.. لا ده انت كمان حتبدأ تجود وتزيد من
جميل الدعاء للي ظلمك.. ده غير السلام النفسي الرهيب والراحه اللي حتحل محل القلق والتوتر كان بيحصل عندك فوران في الدم لما بتفتكره مش حتحس بالشعور الصعب ده تاني.. أوعدك
حتشعر إنك أخف كتيررررر وحاله كده روحانيه مع الله مالهاش زي.. اصل مش ممكن تتاجر مع الله وتطلع خسران!!
” والذين جاهدوا فينا لنهدينهم سبلنا”
حرفياً معني الآيه دي حتعيش تفاصيله.. حتبقي كسبت نفسك ووصلك حقك وعشت مع ربك وممكن جدااا العدو يتحول يبقى صديق.
” أدفع بالتي هي أحسن فإذا الذي بينك
وبينه عداوه كأنه ولي حميم”
“تجاره مع الله.. تجاره دايماً رابحه”
