“انا لا استحق..بل استحق”

بقلم اخصائيه نفسيه / نرمين الزيات

“حينما يمنعون عنهم الحب”

انا لا استحق.. بل استحق!!

جمله بتوصلنا كلنا من اللي حوالينا بصوره أو بأخرى للأسف بدايتها الطفوله …لما يقرر الاب والام انهم سواء عن قصد او من غير قصد يمنعوا عنهم الحب ! معقول في أهل هيمنعوا عن ولادهم أغلى حاجه عندهم في الدنيا إنهم يحسوا بالحب!
تعالوا نشوفها ازاي او نشوف هما بيشوفوها ازاي؟؟

⬅️الاهل ١ 💔
لما يقرروا إنهم يحاسبوا ولادهم علي شكلهم.. ازاي يعني…يعني لون بشرتهم ..فتله شعرهم، يكونوا شبه حد في العيله سواء عمه جده خاله …ايا كانت القرابه شبهه.. هما ما بيحبوهوش فاينزلوا الاسقاط كله علي الولاد ..او البنات…روحي وانتي شبه فلان.. انت شايفه شعرك عامل ازاي.. ده منظر ده !
اسفه للتوصيف بس صدقوني انا بسمع اسوء من كده بمراحل.. السؤال هنا وهاسيبلكم الاجابه تفتكروا اولاد بتعامل الاهل دول هيشعروا بالحب …هيشوفوا الإستحقاق.. وللاسف لان توابع الشكل او الشبه او أيا كان.. بتبقي اني اتجاهله..يبقي عايش ظل مش متشاف ولا مسموع ولا محسوس.. ايه ممكن يكون اوجع من كده !
⬅️الاهل ٢ 💔
اللي بيفاضلوا علي حسب النوع.. يعني يا بيحب البنات…يا بيحب الولاد وهنا بيجي دور المقارنه ويظهر برضه بفجاجه…سواء في الحب او الهديه او العطايا او الكلام او الاهتمام ..بل ساعات بيفرض الاهل ان في طرف يستحمل الاخر ويخدمه وفي اللي كمان بيخليه يتحمل غلطاته.. بأي حق … ليه عند ربنا الحكم العدل النساء شقائق الرجال الا فيما اختص.. وساعات علي فكره تفضيل البنات!!
طيب ممكن ازاي الطرف المهمل اللي شايف نفسه
( ابن البطه السوداء) يشعر بأيه…هيحس بأيه لما يبقي علي طول شايف نفسه ناقص حته …مش واحد صحيح.. يقبل نفسه ازاي وهو علي الرف وحاسس بالاهمال والتجنب والتفرقه.. قادر يقرأ القسوه والقلب الفاضي من المشاعر.. السؤال وهاسيبلكم الاجابه ده اللي مفروض يحس بالحب ازاي ؟!
⬅️الاهل ٣ 💔
اللي بيقيموا ولادهم علي حسب الدرجات زي اللي شغالين في مصلحه كده كل واحد يتعامل علي حسب درجته فأنت هتاخد علي قد ما تدي …فين مستواك، طيب قدراتك ..طيب مواهبك، طيب اي حاجه..لا لا اسف.. درجاتك !!!! وهنا بتبقى المنافسه عنيفه ومرعبه في اللي هايقدر يكمل عشان ياخد الحب والقبول وفيه اللي هايحس انها خسرانه خسرانه ..شروط بشروط مش لاعب ..ويعمل تماما ليقينه انه مهما عملت عمر ما هايعجبهم حاجه اذا كنت انا اساسا متأكد اني مش عاجبهم.. والسؤال هل هو اساسا يجرؤ يسأل ده ولا اساسا شايفه هما بيحبوني ولا لا ؟؟
⬅️الاهل ٤ 💔
تخصص الألفاظ والتهزيق والتخويف والتشجيع بس بالارهاب.. ناهيكم عن الشتائم؛ يا غبي.. يا حمار.. يا اللي مش بتفهم..ابقي قابلني لو حققت حاجه يا فاشل يا فاشل يا فاشل.. هتذاكر يا تسقط ..يا هنشتغل وقيسوا بقي يقولوا كل الاسامي بتاعت اصحاب المهن البسيطه اللي هوا لا شعورياً مايعرفش انه كده وبيتنمر عليهم ..هما مالهومش ذنب.. ولا ابنك له ذنب انه يتربي بالخوف والرعب!
والسؤال واللي برضه تفتكروا هيحس بالحب ؟؟؟
⬅️الاهل ٥ 💔
اللي شغالين كله مع بعضه شويه ضرب وتهزيق وشويه اهمال وترك ولا احضان ولا طبطبه ولا حاجه خالص وشويه مقارنات وتعجيز.. هو اللي اشربي في اي بيت من البيوت دي المفروض يشوف الحب ازاي.. يتأكد منه ازاي.. يقراه ازاي.. ماهو مالوش كتالوج مترجم ؟ !يقولي انه هيفهم اننا بنضغط عليه عشان ينجح ويثبت نفسه.. طبعا انا مارضيتش اكمل بقيه الاساءات زي الاساءه الجنسيه من المحارم اللي بيتاذي بيها الطفل والأهل ولا الهوا !!
تفتكروا هيبقي شكله ايه لما يتجوز.. ولا لما يختار ولا لما حد يأذيه.. هو اساسا هيشوف نفسه يستاهل ازاي باللي اتعمل فيه.. هيشوف الاستحقاق ازاي…هو اساسا هايصدق ان الحب موجود ؟
هيصدق انه يستاهل يتحب؟!
ليه كل ده وعشان ايه ؟
علشان درجه..ولا علشان ميداليه علشان تمشي تتباهي انه شكله حلو ..ده خلقه ربنا علي فكره!!
هو كم التعقيدات في العلاقات مع الكبار ده مصدرها لو انت اتعرضت لاي صوره من صور الإيذاء روح اطلب مساعده متخصص.. لو انت هتبتدي حياه جديده روح اتعلم محتاج تعمل ايه في الجواز وتربيه الاولاد واعرفهم.. مش هدفنا اننا نقول اهالينا وحشين لا لا، هما ايا كان اللي عملوه مكانش المفروض بس اتعمل جهل منهم ..مجتمع مليان موروثات تقيله.. وشيلتها صعبه.. ربوكم زي ما اتربوا..طيب هما مكانش عندهم الرفاهية بتاعت التعليم والكورسات والدكاترة والكوتشيز الي اخره.. لكن احنا عندنا ده.. يبقي نطلب مساعده.. اعتذروا ووقفوا…روحوا قولولهم معلش ماكناش نعرف.. اطلبوا ليهم المساعده علشان يتعافوا من الضرر اللي حصل.. انتو بتنقذوا حياتكم معاهم.

وللحديث بقيه

#سلسله_بل_استحق
#نرمين_الزيات
#اخصائيه_نفسيه

اترك رد

لن يتم نشر عنوان بريدك الإلكتروني.