الكلام الحلو مفتاح القلوب.. الكلمات بتفرق جوه قلوبنا
الكلام الحلو مفتاح القلوب.. الكلمات بتفرق جوه قلوبنا
بقلم: الإعلامية ماريان ألفى
بيفرق جدا ، قادر يغير نفسيتك من شخص حزين ومش شايف اي حاجه حلوه لشخص ممكن يبتسم وملامحه تتغير لمجرد انه سمع كلمه حلوه ، الكلام الحلو بيطبطب على القلب وبيداويه
متبطلش تقول كلام حلو لأى شخص علشان حقيقى بتفرق .
في كلمات بتفرق جوه قلوبنا لو سمعناها بتغير مزاجنا وحالتنا النفسيه
بتعدى على الواحد فترة بيحس فيها إنه محتاج يسمع كلام يطمنه يهديه يقويه من ااقرب ناس ليه
بالرغم إنه عارف و متأكد من إنهم بيحبوه، بس عايز يسمع، عايز يحس إنه لسه فى ناس بتحب وجوده في الحياة، زي انا معاك وجنبك
انت شكلك حلو اوي النهاردة
كنت فين الوقت ده كله وحشتني متغبش عني تاني
غيابك بيفرق
ربنا ما يحرمني من وجودك في حياتي
تعالي نحل المشكلة دى سوا
خاطرك غالي عندى اوي
لما بنسمع الكلمات دى بنحسها كأنها حضن و طبطبه ويسلام لو جتلك في وقت انت فعلا محتاج تسمعه
بتحس بفرحه غريبه وإنك فعلا مش لوحدك وبتهون عليك حاجات كتييير
الكلمة الحلوة إللي بتتقال فجأة لأصحابكم أو أهلكم او حتي ناس غريبه عنك بطمن وممكن تغير من يومه
، اتكلموا، و قولوا للي بتحبوهم إنكم بتحبوهم من وقت للتاني وهما عايشين
مش لازم يبقوا مرميين في مستشفى علشان حد يكلمهم ويتطمن عليهم ويحسوا بقيمتهم
و إن في حد بيخاف عليهم
في ناس كتيير انتحرت لمجرد انهم ملاقوش ايد تطبطب عليهم وتحضنهم ماتجيش انت بعد مايفارقوا الحياه تفضل تنزل صور ليهم وتكتب وتقول كلام حلو كانوا محتاجين يسمعوه وهما عايشين كان اكيد هيفرق معاهم
متبخلوش علي حد بالكلمة الحلوه
خلوهم يشوفوا حبكم ليهم في الحياة.