فوائد اليود وكيف تحصلين عليه ومتى تمتنعين عنه “كبسولة فيتامين”

فوائد اليود وكيف تحصلين عليه ومتى تمتنعين عنه “كبسولة فيتامين” تابع أخبار مصر.

 

 

كبسولة فيتامين .. من المؤكد إنه مع نسمة هواء صيفية ورشة مَاء على بشرتك من مياه البحر، جسمك مش بس بيستجم، ده كمان ممكن يكون بياخد جرعة طبيعية من عنصر حيوي إسمه “اليود”!
بس يا ترى ده كفاية؟ ولا جسمك محتاج دعم إضافي؟ تعالي نكتشف سويا.

 

بقلم / رؤى مصطفى

اليود هو عنصر معدني بسيط في شكله، عظيم في تأثيره! ضروري لصحة الغدة الدرقية اللي بتنظم لنا الطاقة، والحرارة، والمزاج، وحتى الدورة الشهرية. نقصه ممكن يعمل كسل وخمول، زيادة في الوزن، تعب مزمن، وتساقط شعر، وكمان اضطراب في الخصوبة.

مين محتاج اليود أكتر من غيره؟

الحوامل والمرضعات: لأن نقصه بيأثر على نمو مخ الجنين.

الأشخاص الذين لا يتناولون ملح مدعّم باليود فى طعامهم أو بيستخدموا ملح البحر فقط.

الناس اللي عندهم مشاكل في امتصاص المعادن أو بيلتزموا بأنظمة غذائية نباتية صارمة.

 

لكن… مش كل الناس محتاجة مكملات، لأن زيادة اليود أيضاً ممكن تسبب مشاكل في الغدة الدرقية، خصوصًا لو عندك تاريخ مرضي معاها.

هل البحر كفاية للحصول على مايكفى من اليود؟

في الصيف، التعرض للمياه المالحة والهواء الساحلي المشبّع بيود طبيعي ممكن يساعد الجسم على امتصاص كميات بسيطة جدًا من اليود عن طريق الجلد والتنفس. لكن للأسف، دي مش وسيلة يعتمد عليها بمفردها. يعني البحر مفيد؟ أيوه. كافي؟ لأ.

إزاي أضمن إني باخد كفايتي من اليود؟

 

استخدمي ملح مدعّم باليود (بس باعتدال).

كلّي أسماك بحرية زي التونة والسردين والسالمون والجمبري.

منتجات الألبان والبيض فيها كمان نسبة كويسة.

لو طبيبك شاف إنك محتاجة لنسبه أعلى، ممكن يرشحلك مكمل غذائي مناسب.

 

كلمة أخيرة ليكي

 

لو حسيتي إنك دائماً تعبانة، ومزاجك مش ثابت، أو دورتك ملخبطة، فكري تعملي تحليل لهرمونات الغدة الدرقية. يمكن جسمك بيهمس لك إنه محتاج “رشّة يود”!

وخلي بالك: مش كل حاجة نلمسها في البحر تبقى علاج… لكن كل حاجة نعرفها عن جسمنا بتقربنا من الصحة والجمال